Hawaii Holomua, 2 May 1891 — HOAO E LAWE I KE OLA. [ARTICLE]

HOAO E LAWE I KE OLA.

Ma ka po Poaono i hala, ua ulu ae la he wahi kuee mawaena o ka noho ana ohana o Frank May, he haole kamaaina i mare ia me kekahi wahine hapahaole a ua loaa na keiki. Ua ulu ae keia kuee mamuli o ke komo pu ana aku o kekahi mau haole elua a hoolauwili i ka noho ana kane a wahine, a mamuli o ka piha inaina a me ka inoino o ka noonoo, ua hoao iho la ua Frank May nei e lawe ae i kona ola. Aia mawaena o ka hora 3 a me 4 o ke kakahiaka Sabati, ua kii aku la oia i kana pahi kahi umiumi a oki ae la i kona lima hema maluna ae o ke kuekue lima hema, a moku iho la kekahi o na aa olona, a ua kahe nui mai la ke koko. Ua ike koke ia keia mea, a ua kii ia na kauka Makawena me Pitasona a na laua i hoopaa ke koko a humuhumu ia kahi i poino, a lawe loa ia no ka Halemai.