Hawaii Holomua, 2 May 1891 — KO WAIEKENA IA. [ARTICLE]

KO WAI E KENA AI.

"Hoonu'anu’a ka luna o Lanihuli, Ohuohu i ke oho o ka palai me ke kupukupu.” - — Ua papahi ae makou i keia mau lalani mele maluna ae, mamuli o ka ike maoli iho no i ka piha pono o na opi aoao o ka kakou ‘‘Milimili” nei me na oolopu wai huihui a ka Naulu e ko'u ai ka puu. O keia mau hiohiona he mau hiohiona keia i maalo mua ole aku imua o ko oukou mau kiionohi maka mamua, aka ano wale ae la no i ike ia ai, ka hele a ku-palaka me na kohikelekele a ka Puukolu. He mea haohao paha a ku-nana nou e ka makamaka ka ike ana i keia malihini hou me kona paikini e ui’na ai ka wai o Namolokama? Ae, he mea oiaio ia, aka nae, o ka hikimua keia o ka hookoia ana o na iini i lolii loihiia iloko o makou, e hooko aku i ke koi ana a ka pana o ke aloha iloko o ko makou puuwai no ko kakou aina a me ka lahui, a no ka hoolawa ana aku hoi kekahi i na ikuwa o ka poe makemake i na moolelo, a no ia kumu ua hoopihaia a mahuahua na kolamu me na Nanea e puka aku nei a ma ia ihu hookahi hoi makou e hahai mau aku ai. Nolaila ma keia helu o ka kakou pepa, ua hooko ponoia ko oukou mau makemake a pau e na makamaka, a he aapu wai hoi keia e kena ai ka makewai heluhelu; a oia kela mau wahi lalani hooheno ma ke poo o keia kukulu manao e keha ana a kau i kaupoku o Hanalei, ohuohu pono ke kino o ka nupepa HAWAII HOLOMUA e noke ka puni heluhelu a uiha, a hookahi puana maemae, "Ua kena au i ko wai.”