Hawaii Holomua, Volume III, Number 2, 7 January 1892 — NA LUNAKANAWAI KAAPUNI. [ARTICLE]

NA LUNAKANAWAI KAAPUNI.

E ike ia ana ma kekahi kolamu o ka kakou nupepa o keia la, na inoa o na keonimana i hookohu ia i mau Lunakanawai Kaapuni no ka Apana Hookolokolo Ekahi. Ua manao makou o na hookohu o keia ano, aia no ia mamuli o ke ao ana aku a ko ka Moiwahine Aha Kuhina. He minamina nui ko makou i ka hoonoho ole ia ana i kanaka Hawaii ma kahi o ka noho elua o keia mau Lunakanawai. Ua lawa kakou me na kanaka Hawaii makaukau, a o kekahi poe o lakou, ua oi aku no mamua o ka haole i hookohu ia ae la, a o ka hoonoho ole ia ana o kekahi oia mau keiki papa o ka aina me ka lawa o na hooia ma na palapala noi i kakauinoa ia e na poe koikoi o ka aina—he mea ku i ke kahaha a he kumu hoi e hoohuoi iho ai no na hana ano e a keia Aha Kuhina. O ka mea i noho ae la ma ua noho elua nei, he keiki i hanau ia ma ka aina e, a he hoahui no Kakina, a aole i ike ia kana mau hana kaulana no ka pono o keia lahuikanaka a no keia aina hoi. He oiaio no hoi, ua ulu ae a nui ma Hawaii nei, a he keonimana maopopo kona kulana, aka, me ia mau haawina a pau, ke manao nei makou, aole i oi aku kona kuleana no kela noho oihana mamua o ko ke kanaka oiwi ponoi o ka aina i oi aku ka makaukau no ia kulana mamua o kona.