Hawaii Holomua, Volume III, Number 3, 14 January 1892 — OLA ANEI O HAWAII IA HAWAII? [ARTICLE]

OLA ANEI O HAWAII IA HAWAII?

He ninau ano nui keia—he ninau pilipono i kahi i makemake ia —he ninau imua o ko alo e ke kanaka Hawaii; a o kau haina, oia ka hoi ka makou e lawe ae a e hoolilo i mea kaupaona no ko makou lunaikehala. O ka makou wale no e olelo ae, ua hohe na kanaka o ke Alii, a ua upelu na maka a imo aku i ka malihini, me ka manao kuhihewa aia ilaila ke aloha. Alaila, ninau iho ka puuwai aloha Alii a makee aina—he oiaio

anei—e ola ana o Hawaii? Pane mai la ka leo o ka hanehane— "E—ko—ana!" "Ko pehea—me ka hoihope anei o na kanaka a ke Alii i iini ai, i mailani ai a i —i aku ai—o oukou Ko'u mau kanaka, a e ola Au ia oukou? A i ole, o na kanaka e hoihope nei a e hanaino nei i ke Alii. A e ninau kakou owai ia poe? Na makou e hai aku i na inoa o lakou; eia ka moolelo me makou, aka, ua olelo makou—aohe inaina, nolaila, e hoomanawanui i pono ai.