Hawaii Holomua, Volume III, Number 3, 14 January 1892 — NUHOU KULOKO: [ARTICLE]

NUHOU KULOKO:

Ua hoemi ia ka uku o na keiki puhi ohe, pela ia mai. He 20 a oi ka nui o na poe paahana alanui i hoopau ia no ka nui ole o ka hana. He pauahi ko ka po Poaono nei ma alanui Beritania, a mamua ae nae o ka hoea ana aku o na kaawai, ua pio iho la ke ahi. Ua haawi makana aku o Mr. P. Isenberg i ka Puali Puhiohe o ke Aupuni me ka ohe nani, nona ka waiwai io he $75. Mahalo. He olelo hoolaha ka Henry Smith, no ka mea e pili ana i ke pai a me ka humu ana i ka buke ewalu o na hoike o ka Aha Kiekie ma ka olelo Hawaii. Ike pono kela wahi haole i hopu ia ai ma kekahi o na la o ka pule i hala, oia hoi o George Ryan; no ka mea, e kipaku ia aku ana oia mai keia aupuni aku. Ua lawe aihue ia mai ka hale noho aku o Mr. J. M. Whitney, ma alanui Punahou, ma ke ahiahi Sabati nei, he $10 mailoko aku o ka pahuume. Ua hoao ia e imi ke kolohe, aka, aole nae i loaa ka meheu. Aole e hoau koke o Kapena A. N. Tripp i kona kulana hou i keia wa, a keia pule ae, alaila, hoomaka. O Mr. S. F. Chillingworth o Maui, ka inoa hope i loheia e hookohu ia aku ana i Hope Ilamuku ma kahi o J. A. Mehrten, ka mea e lilo aku ana i Kiaaina no ke Kakela o Puuwai Eleele. Maluna mai e ka Mariposa e hoohikihiki hope loa ia aku ai na ukana pili i na mea hoikeike o Nu Wale Hema, no ka lawe ana aku i ka Hoikeike Nui o ke Ao ma Kikako, Amerika. Ma ka Poaha nei i hoau ae ai o Kapena A. S. Mahaulu o ka Oihana Makai i kona kulana ma ka hopu ana i na opio i kaulana iho nei no ka aihue i kela mau la iho nei. O Meleana Keliimauwele, ua hala i ke ala hoi ole mai iloko o na hora poniponi wale o keia wehenakaiao ma Niuwaipai, Honolulu nei. He ekolu mahina i hala ae nei kona loohia ana i ka mai pehu, a he mau makahiki ka hoomailo ana a ka mai hano. Me kona mau kini ko makou luuluu pu ana, i kona haalele ana mai ia lakou iloko o ke 65 o kona mau makahiki. O kekahi o na keiki kanaka i hopu ia ai ma ka Poakahi nei, no ka hewa aihue, nona ka inoa o Momona, ua hopu hou ia no oia ma kekahi la mai ao ka aihue ana i kekahi paa mikilima mai kekahi mai o na Halekuai o Alanui Papu. Ikaika no ka Iole nana i ai ka piko o keiki. Ma ka Poakolu nei kakahiaka, oiai e noonoo ia ana ka bila Loteri imua o ka Hale Ahaolelo, ua hoohulihuli aku la kekahi o na poe i hui ai a upu i ke poo o ko kakou Moi i make, ua uwe aku la ua maalea la imua o ka Mea Hanohano me ka helu papa aku i ka nui o na o lakou no kela kanawai ke holo. Ua pane aku ka Hoa, pehea hoi e pilikia ai, no ka mea, he mau Iapana ka oukou e pulama mai nei, aole hoi o na kanaka Hawaii ka poe nana i hoowaiwai aku i ko oukou mau makua, oia hoi ka oukou e noho ulakolako nei, a heaha hou aku ko oukou pilikia? Mea manana ka ia o na manamana lima, aa na maka a hamama ka waha.