Hawaii Holomua, Volume III, Number 202, 18 April 1893 Edition 02 — HE PONO ANEI? [ARTICLE]

HE PONO A NEI?

Ka hoea mau mai nei na manao hoike maoii i ke kue a me ka hooweliweli i ke Aliiaimoku a me ka poe a pau i aloha a kupaa mahope Ona maloko o na nupepa a ka poai hoc»hui aina. Iloko o ka nupepa Awalakaikao keia kakahiaka, ua puka ae kekahi manao i piha me ua huaolelo ku maoli no i ka hooweliweli ma ke eno o ke kaona. me he la ua uluhia ia me ka makemake lawe ola. Pehea la iaa ai kela nupeoa e hookomo i kela manao, oiai, eia no ko kakou Aliiaimoku a me kakou a pau ke noho maiie loa nei me ka mumule a me ka oni ole ae, koe wale no ko kakou hiipoi i ke aloha pilipaa i ko kakou Aliiaimoku a me ko kakou kulana Aupuni Moi. Aole anei i maka’u keia poe i ko lakou mau aka iho.