Ke Aloha Aina, Volume I, Number 1, 25 May 1895 — Ka Hookaawale Aina. [ARTICLE]

Ka Hookaawale Aina.

O ka Hoohui Aina, oia ka mea hoao mau ia e kekahi poe lahui iloko o na makahiki he nui a lehulehu a hiki i keia wa; me ka manao aia na pomaikai ilaila, aka, eia kekahi pomaikai oi loa aku, oia no ka hookaawale aina. Ua nui na hoao ana a me na hooikaika ana a kekahi mau lahui a me na Alii, e hookaawale i na aina, a e oki i mau auwai e hiki ai ke hookaawale kekahi aina mai kekahi mahele mai ona. Ua hana ke Akua i ka Lani a me ka honua, a ua hoohui i na wai, a hookaawale ae la i na aina maloo. Ua mau ka waiho pili ana o na Aina puni ole o Asia a me Aferika a kokoke e hala na makahiki he 5860, alaila, oki ia kela Puali o Sueza, a kaawale na aina a hiki i keia la. Ke holo nei na moku he nui wale maloko o ia auwai me ka lawe ana i na waiwai he nui wale me ka hikiwawe loa. He hookaawale ia, a he mea pomaikai nui no ke ao holookoa. Mamua aku nei, ua hoaoia e oki i ka Puali o Panama, a kaawa!e aku o Amerika Akau me Hema, aole nae i holopono loa. Ano, ke hoolala ia mai nei hoi e oki i alawai ma ka lokowai o Nicaragua mai ka Atelanika a i ka Pakipika, a ina e moku ana, alaila, he hookaawale ia, he mea e pomaikai ai ke ao holookoa. Ke hooikaika nei kekahi poe ma ka hoohui aina, a ke hooikaika nei no hoi kekahi poe i ka hookaawale aina. O ka Paemoku nae o Hawaii nei, ua kaawale mau loa ia, aole loa e hiki ke hoohui ia me Amerika a pau loa ae keia ao, oia ko makou ike e nana nei.