Ke Aloha Aina, Volume I, Number 1, 25 May 1895 — Ka Manaolana [ARTICLE]

Ka Manaolana

O ka manaolana o ka kakou milimili, "KE ALOHA AINA," e halawai mai oia me na hookipa pumehana ana a kona lahui oiwi, a me ka poe e lawe ana i kona kino ahailono iwaena o keia Pae Aina holookoa, a e loaa mai hoi na kokua makana aloha ana e mau ai kona ola. He mea i hoomaopppo mau ia e na lahui naauao; o keia malama o Mei nei, he malama kaulana no ia iwaena o na malama he umikumamalua o ka makahiki. O keia ka malama i kapaia, "Ka Moiwahine o na Pua," no ka uluwehiwehi o na pua i mohala mai na mala-pua mai, a ua kapaia no hoi ka Moiwahine Mei. O ka Moiwahine Vitoria o Beritania Nui, ua hanauia oia ma ka hora 4 me 15 minute o ke kakahiaka o ka la 24 o Mei 1819, he Poakahi, ia ma ka Halealii Kensington ma Enelani. Eia ka nupepa "KE ALOHA AINA," ke hoea aku nei imua o oukou ma keia mahina kaulana no ka wehi o na pua aala, a no ka kanau ana o ka Moiwahine kaulana o ke ao nei. No!aila, ua lana ko makou manao, e haawiia mai ana na pua ohaoha o ke aloha i mea e hoomauia ai ke ola ana o ka nupepa. O keia la 20 o Mei nei 1895, oia ko makou la e hoea mua aku nei imua o ko makou lahui. He kaulana ka la 20 o lune 1819, o ko kuini Vitoria pii ana aku iluna o ke kalaunu o Beritania, pela e lilo ai keia la a "KE ALOHA AINA" e hoea aku nei iloko o ka puuwai o ka lahui i aloha i ko lakou aina i la kaulana.