Ke Aloha Aina, Volume I, Number 3, 8 June 1895 — KANA HOIKE MAI. [ARTICLE]

KANA HOIKE MAI.

Ua loaa mai ia makou he hoike palapala mai ia John Richardson mai o Wailuku e hooiaio mai ana i kona kamailio pu ana me W. O. Smith, Loio Kuhina o ke Aupuni Repubalika; a penei na olelo a Smith iaia: "Aole ke kaliua o ke Aupuni he kahua hoohui aina: He kahua hoohui ma ke Kuikahi wale no; a mau no ka noho kuokoa ana. Na kakou no e hooponopono ko kakou mau Kanawai a me ke Aupuni, aole hoi malalo o ka noho mana ana a na kanaka mai Wasinetona mai, a mai ka mokuaina mai paha o California." lna o keia ka mea pololei, a ua olelo maoli aku o Smith pela; alaila, ke manaoio nei makou, he lalau loa na olelo a Kakina imua o kela Hui Amerika e olelo ana, na Keoni Likikini i hoolaha ma Maui (wahi a Smith) ke hooikaika nei o Kakina i ka hoihoi Aupuni Moi malalo o Kaiulani.

Ina he oiaio, pela na olelo a ka Loi Kuhina; alaila, ke manao nei makou, ua kuhihewa ka poe o ka Hui Amerika, a ua hoohoka ia ka lakou mea e li'a mau nei, he hoohui aina. Mamuli o na lohe mua, a mamuli hoi o na mea e ike ia nei, ke manaoio nei makou, ua ano pololei maoli ka Keoni Likikina olelo, oiai, aohe o lakou nei makemake na ko waho mai poe e noho hoomalu maluna o kakou, nolaila, ina e hoohuiia ana keia mau Paemoku me Amerika, alaila, e lilo ana mai Wasinetona mai ka hoonoho ana i ke Kiaaina a me kekahi mau Luna Oihana e ae, a nele iho lakou nei. O kela manao alunu, ua paa loa ia, aole ae na ka lehulehu e koho i na Luna Oihana, ma kahi a lakou i ike ai, oia kahi o ka mana nui, a me kahi hoi o ke da!a e ku ai ka paila. O! Aole o lakou ae ia mea. Ina pela; alaila, ua ahona no ko makou hoihoi hou i ke Aupuni Moi, malalo nae o ka makou hoonoho ana, i paa makou maluna o na kahua pomaikai nui o keia aina. O ke kumu i oleloia ai, a i hauwawa ai maloko o na nupepa o na Aina E, o ko Kakina hooikaika loa e hoihoi i ke Aupuni Moi malalo o Kaiulani, aole makou i ike ia mea, aka, pehea la i olelo wale ai o ua o Kakina, he manao aloha kona no Kaiulani ? No keaha la ia mea? Ina o keia ka oiaio, alaila, aole no i makemake ia ka hoohui aina e ka poe e noho mana nei, a ua kue loa i ke kahua a lakou i kukulu ai i ka Repubalika.