Ke Aloha Aina, Volume I, Number 4, 15 June 1895 — KA LEO O KA HAPANUI. [ARTICLE]

KA LEO O KA HAPANUI.

O ka leo o ka lehulehu, oia no ka leo o ka hapanui o ka lahui o ka aina. Aole he hana a kekahi lahui, a i ole ia, a kekahi aupuni paha, i hiki ke kapae ia ae mawaho o keia rula pololei. Ke hahai nei na Hale Ahaolelo Kaukanawai a pau loa o na lahui like ole, malalo o keia kahua onipaa. Pela ma Beritania, ma Amerika, ma Farani, ma Geremania, Italia, Helevitia, Austria, Denemaka, Norewai me Swedena, a me Holani, a me na aupuni e ae he lehulehu wale; a pela no hoi ma Hawaii iloko o ka wa e noho ia ana e ke Aupuni Moi. Iloko wale iho nei no o keia wa ano o ka hoololi ia ana o keia rula paa, a lilo o ka hapa uuku o ka lahui ka leo mana! Ahaolelo Kaukanawai a pau loa o na lahui like ole, malalo o Farani, ma Geremania, Italia

He aneane 13,500 poe kupono i ke koho balota ma ko Hawaii Pae Aina holookoa iloko o 1892; aka, ma ke koho balota ana iho nei o ka Repubalika iloko o Oct. 1894, ua emi loa ka huina o ka poe i ae ia e koho a aia kokoke i ka eha tausani paha. Ka aneane no ia i ka hookahi hapakolu a emi iho, o ka nui o ka poe koho a pau loa. Oia koho ana, oia no keia Aha e noho nei, aole ia mai ka hapanui mai o ka lahui mamuli o ke koho Kuokoa ana me ka lanakila. Eia nae hoi, i keia wa no, a oiai no nae keia Ahaolelo e noho ana e hana i ka lakou hana, ua hiki ole maoli ia lakou ke hooholo i ka lakou mau hana, mamuli o ke koho ana a ka hapa uuku, e like me ke ano o ke kukulu ia ana o ka mana nana lakou i koho iho iloko o Okatoba 1894. Ke hapai nei lakou, a ke hooholo nei, mamuli o ka ae ana o ka hapanui wale no, aole hoi na ka hapa uuku. Ke lawe mai nei no lakou i na rula no lakou e koi ana na ka hapa nui e apono, a e hooia i na hana a pau loa.