Ke Aloha Aina, Volume I, Number 26, 16 November 1895 — KO KE ALOHA AINA MANAO. [ARTICLE]

KO KE ALOHA AINA MANAO.

O ko KE ALOHA AINA manao mai mua mai, a mai kona wa i hookumu ia ai ma ka la 20 o Mei, 1895, oia ke kono ana aku i kona Lahui Hawaii holookoa mai Hawaii a Niihau, e kokua kela a me keia i kona hoa kanaka iho. Ua hoakaka mua makou, ma ko ka Lahui Hawaii ponoi hoolako ana aku i na hale kuai a pau loa o na haole, na pake, na Iapana, a me na ano lahui e ae i na dala apau loa i loaa ia lakou a e hele e kuai ma ia poe halekuai. Aole ma ia mea wale no, aka ma na hana maoli no kekahi na hana aupuni hoi. Oiai, i ka wa e noho kakahi poe ma na kulana oihana aupuni iloko o na kau Aupuni Moi i hala aku, ua hukiku na maka o ua poe nei no ka hiki ana iho la i ka la o ka loaa, alaila, aole iho la e hiki ke ike i kona hoa kanaka Hawaii ponoi o kona lahui hookahi, a ili hookahi. No makou iho, he hoowahawaha loa makou i na ano kanaka e ike ole iho ana ia Hawaii, oiai e ola ana no ka lahui Hawaii. O ka poe i hoao e kii okoa aku a kaili mai i ka hana, a i ke kulana paha o kekahi mea e paa ana o ia hana hoopailua no ia a makou i makemake ole loa ai. Aole makou he welo, a he mamo paha na ka poe moe-ala a no kekahi ohana kauwa makawela e hiki ai ke hana ia mea. Aole loa ! O ko makou puuwai, ua hamama piha no ke aloha i na hoa kanaka a pau loa, a ma ia meal, he hookahi wale iho no ana e hoomau ai, oia ka hoomanawanui ma na mea a pau loa.