Ke Aloha Aina, Volume V, Number 11, 18 March 1899 — OLELO HOALOHALOHA A KA AHAHUI ALOHA AINA O NA WAHINE O HILO KAONA. [ARTICLE]

OLELO HOALOHALOHA A KA AHAHUI ALOHA AINA O NA WAHINE O HILO KAONA.

I ka Mea Hanohano A. S. Cleghorn Aloha oe: Ua ili iho maluna o makou ke kaumaha no ka lohe ana, ua oluolu i ka Makua Lani i ka lawe ana aku i ka Mea Kiekie ke Kama'liiwahine Kaiulani Kalaninuiahilapalapaikekapu, ko makou Hooilina Moi o Hawaii nei, kau kamalei aloha hookahi. Nolaila, ke waiho haahaa aku nei makou na lala a pau loa o ka Ahahui Aloha Aina o na Wahine o Hilo Kaona nei, i na olelo hoalohaloha, imua o kou hanohano penei: E Hooholoia—O makou na lalana me na Luna Nui a pau o ka Ahahui Aloha Aina o Hilo Kaona nei ma ko makou mau komite la, ke komo pu nei me oe iloko o ke kanikau kumakena pu ana me ka paumako minamina pau ole no ko makou Hooilina Moi i aloha nui ia. E Hooholoia—Ke pule pei makou i ke Akua Mana Loa e hoomama mai i kou noho'na kaumaha, a me kona lahui e komo like nei ma ia haawina hookahi, a na ka Haku e malama ia kakou a pau loa iloko o kona lima aloha a lokomaikai piha. E Hooholoia--I hookahi kope o keia olelo hoalohaloha i ka Mea Hanohano A. S. Cleghorn, a i hookahi kope e hoolaha ia ma na nupepa Hawaii. Hana ia a kakau ia i keia la 9 o Maraki A. D. 1899. Me ka mahalo, Mrs. Hattie Nailima, " Kekona Pilipo. " Annie Lewis, " Alai Akana, " Lilia West, " Mihana Ai, " Kanoelehua Brown, " Sarah Hapai, " Lahilahi Kaapa, " Kalani Lockington, " Kalei Milikaa, Maty Kaiuaola. "Ia Huilailuna Kalani, owaka ka Honua, Malamalama Kahiki, Ahuwale ka Moku-ka Aina." E ke Alii Moiwahine Kanemake Kapiolani, a me ka Ohana Alii a pau, Aloha oukou: Iwaena o na ouli kupaianaha a ke Akua i hooili ia maluna o oukou na alii hanau o ka aina, a me makou ka lahui, i ka ukana luuluu o ke kaumaha walohia no ka lawe ana aku o ka Makua Lani i ka hanu makamae o ke Kama'liiwahine Kaiulani Kalaninuiahilapalapa. Ka noa-noa o ke ka kuhihewa, O ke pani paa ia o kapu kuhihewa O kuhihewa o kuhihewa, O ka ihi kapu a kuhihewa, O kuhihewa makawalu o ka ua upena, Nona ke kapu i holo ka ea mawaho. Holo ka maeele ke aloha a puni na moku, auwe! ka minamina e, ua hala, ka pulakaumaka hoi a ka lahui, O oe ia e Kalani, i hui ai na moku Eiwa hoi ke kapu, eiwa hoi ka wohi o nei alii, O ka umi kumamaha ia o ke kapu la, Kapu Kaula ua hoomeha ka moku Ua ano meha mai ia luna o Waahila. E Hilo e, hilo oe i ke aho a ke aloha, Nau ia e uu a na wale iho no. Nolaila, me ka haahaa, ke waiho aku nei makou, na lala a pau loa o ka Ahahui Aloha Aina o na Wahine o Hilo Kaona i keia ole-

lo hoalohaloha imua o kou hanohano alii, penei: 1. E Hooholoia—O makou na lala me na Luna Nui a pau o ka Ahahui Aloha Aina o na Wahine o Hilo Kaona, ma ko makou mau komite la, e komo pu aku me oukou iloko o ke kanikau kumakena no ko makou Hooilina Moi i aloha nui ia, i hala aku nei. 2. E Hooholoia.—Ke pule nei makou i ke Akua Mana Loa e hoomama mai i kou noho'na kaumaha a luuluu, a me kou ohana alii a pau, pela pu no hoi me makou ka lahui iloko oia haawina like. A na ka Makua-kahi-kolu e malama ia kakou a pau loa iloko o kona poholima aloha. E Hooholoia.--I hookahi kope i ka Moiwahine Kanemake Kapiolani, a i hookahi kope e hoolaha ma na nupepa Hawaii. Me ka mahalo, Mrs. Hattie Nailima, " Kekona Pilipo, " Annie Lewis, " Alai Akana, " Lilia West, " Mihana Ai, " Kanoelehua Brown, " Sarah Hapai, " Lahilahi Kaapa, " Kalani Lockington, " Kalei Milikaa, Mary Kaiuaola.