Ka Leo o ka Lahui, Volume II, Number 495, 8 July 1892 — Page 1

Page PDF (915.61 KB)
This text was transcribed by:  Audrey Matsuoka
This work is dedicated to:  Awaiaulu

KA LEO O KA LAHUI.

"E Mau ke Ea o ka Aina i ka Pono."

 

Buke II.           HONOLULU IULAI 8, 1892.                       Helu 495

 

HE MOOLELO KAILI PUUWAI

NO

SENIA LUTERA

 

Ka Ui Puuwai Mabala

o

ENELANI KAHIKO.

 

A I O@E

 

He Nanea Hooheno no kekahi Kauna Wahine Opio me kana mau Aloha Ekolu.

 

(Mai ka peni mai a ka mea kakau o Aca@ a pela aku.)

 

MOKUNA I.

 

Heaha ke kumu nui i hookaumaha

ia ai kou mau helehelena, e hai

mai e ka ipo, i ole ai e wawahiia ko'u puuwai.

 

            Aole anei ou manao o kau hana, ina oe he kaikamahine aloha makua, oia ke kiai ana ma ka aoao o kona moe o ka make, ke ike oe ua kokoke e helu ia kona mau hora ma keia ola ana; aole o ka uhai hele mai mahope o'u a hana mai hoi ia'u e like me keia, a hoi iho no hoi aole o Heneri e ae ana e kaili hou aku i ka mea ana i haawi lilo mai ai ia'u.

            Aole au he io a he koko nona, aka nae e hele aku ana au e kiai nona, me ka nana ana iaia a hiki i kona hanu hope loa.

            Nolaila, e oluolu oe e hookaawale ae i ke alanui, i hiki ai ia'u kehele aku ?

            No ka mea he ololi loa keia wahi o ke alanui, a ina no e hapa pu ana kekahi keehina wawae hookahi, o ka haule no ia o kekahi o kaua ilalo o keia kipapali no kona hopena manaonao iluna o keia mau pohaku nunui e waiho mai la@lalo.

            E akahele e keia hupo nui o ke ao nei, no ka mea aole au i makaukau no ke kiola ana aku ia oe i keia manawa, aka nae he mea hiki ia ia'u ke @ana i na manawa a pau a'u e makemake ai !  wahi a Enora me ka hoomau ana mai:

            E hoopaa mua mai oe imua o'u ano, mamua ae o ko'u hookuu ana aku ia oe, aole oe e ike hou, hoopa a honi hou paha me Heneri ma keia mua aku no ka manawa pau ole, ina aole oe e ae mai ana i ka'u mea e koi aku nei aole au e hookuu ia oe a hiki i ko'u -

            Aole nae i pau pono ae ka Enora mea i makemake ai e kamailio mai ua ninau koke aku la o Senia:

            Heaha mai kau hana ia'u e Enora, ina aole au e punihei aku ana i kou makemake?

            Aole anei oe i ike e pepehi aku no au ia oe a make me ko'u mau lima ponoi, wahi a Enora i pane mai ai me ka leo kalakala heu panini i hoopuua ia me ka huhu nui, mamuli o ko Senia kamailio mau aku iaia me ka leo haahaa a oluolu, e hoike okoa mai ana no aole ia mea he huhu i hoopunana ia iloko o kona puuwai, me ka papahi mau ana o na minoaka hoohaehae ma kona @u papalina, e n@le ole ai ka paumaia o ke aloha a pii iloko o ka naau o ka poe e ike aku ana.

            Aole au i ike he mea paakiki ka hoopau ana ia mea he aloha, wahi a ua Senia nei i nal@ iho ai iloko ona; a aole no hoi o'u manao o ke aloha ipo ke kumukuai e lilo ai ke ola o kekahi mea e like me a'u, aka aole au i ike i ko ke aloha mau aoao a pau, a ua opiopio loa hoi au no ia moa he aloha.

            Heaha ke aloha, aole au i ike ia mea, a no Heneri hoi, ua aloha anei au iaia?  O! aole i maopopo ia'u ka hohonu o ia huaolelo he aloha.

            No kekahi minute kana kukakuka ana me kona naau akahi no oia a kamailio mai -

            No keia manawa he mea pono ia kaua ke hoopanee i ka noonoo ana i keia mea no kekahi manawa aku, no ka mea aole au i makaukau loa no ka pane ana aku i ka'u haina i keia manawa, aka nae o ka'u e makemake nei, e kaili aku oe ia Heneri mai a'u aku, ina ua hiki ia oe ke hana pela.

            Me na olelo a Senia maluna ae, ike aku la o Enora i kekahi mea e hele mai ana no Enora i kekahi mea e hele mai ana no kekahi mau haneri i-a, nolaila hookuu mai la oia ia Senia e hele.

            A oiai na Senia nei e motio pololei ana no kahi a ka moiwahine poino e moe ana i@oko o ka hopena maopopo ole, he pololei maikai kona oiwi kin@, a he ku wale no kana mau onina a pau i@ka nani a me ka ono, oiai kona mau maawe lauoho makalii me he l@pi dala ala ka hinuhinu imua o na kukuna o ka la.

            E make oia e pono ai wahi a ke kaikamahine kuewa, oiai kona mau nanaina ua hoinoino ia e na ao hakumakuma o ka huhu maka eleele no Senia.

            E make mua oia e pono ai mamua o kona lilo ana i wahine na Heneri.  O, e kuu Akua, e hookaawale ae oe ia Senia mai ko'u alanui ae o ka hauoli, oia hookahi ka'u e nonoi aku nei ia oe !

Aole i pau.

 

HE MOOLELO

NO KE KEIKIALII

 

AWAREDA!

 

a me

KA UI LEILA

o Noremadi.

 

(Kakauia no Ka Leo.)

 

MOKUNA XI.

 

            Ua komo pu oe iloko o keia mau hana a pau mai ka mua mai, a malalo no hoi o kau mau hoolala ana i lawelaweia ai keia mau hana.

            Oia hoi..hookahi manao nui o ka laweia ana mai o ka poe a'u i hoonoho aku ai i mau kiai no Kamila ma, oia no ka aihue ana ia Leila, aole he mea e ae.

            O oe - o oe e Lameka, ua hooholo mua oukou me Koma ma e kaili ia Leila.

            No ka mea, nau i waele ke alanui no laua, i holopono ai ka laua hana lima nui.

            Aole anei pela e Lameka, e pane mai! wahi hou a Awareda.

            Ke kamailio mai nei oe e ka moi opio, me he me mea la ua ike oe i na mea a pau i hanaia, wahi a Lameka.

            He oiaio kela, ua like au me ka mea i ike i na mea i hanaia, wahi a Awareda.

            No ka mea, o kou mau helehelena - ke ano o kou leo, a ma kau mau onina a pau, ke hoike mai nei lakou a pau i kau mea i hana ai.

            Nolaila, o oe io no kekahi i komo pu iloko keia hana elike me ka'u e paaki@ i nei.

            O, e Lameka maikai, pehea la oe i ae ai e hookipa aku i keia uhane o ka ino a me ke aloha ole iloko o kou poo.

            Maluna no ou kau olelo, aole maluna o'u.

            Aole anei o oe ka i uluhia e na uhane ino, no ka mea, ua hoohuli aku oe i kou ku@ i na aumakua o ko kakou mau kupuna, mamuli o ke aloha i kekahi kaikamahine a ka@aka.

            Mamuli o ke aloha i kekahi kaikamahine a kanaka!

            E Lameka, ua hoohuli aku au i ko'u ku@ i na aumakua o ko kakou mau kupuna.

            Wahi a Awareda i panai hou mai ai me ka leo haahaa me ke kaomi malu ana o kona mau lima elua mamua o kona umauma.

            Ae, e kuu hiku.

            Aole anei oia ka mea nana i alakai aku i ka nui kino @ kuu haku i kahi o Kamila ma i kela po aku nei, me ko ike iho no, ua makemake na lani ia oe e haawi i kou aloha i ka mea i ku i kona makemake no ka pono o ka aina a me kou mau makaainana.

            Aka nae, ua kapae ae oe ia mea mahope ou.

            Aole anei pela?

            E akahele oe e Lameka, a e noonoo hoi i kau mea e kamailio ai imua o ka mea e ku aku la imua ou.

            No ka mea, aneane e hiki ole ia'u ke hoomanawanui i kau mau olelo.

            Nolaila, e akahele oe ia oe iho, o hoopoina auanei au ia'u iho ano.

            No ka manawa hope loa, wahi hou no a ua moi opio nei i hoomau mai ai, e pane mai i ka haina o keia ninau a'u.

            Ma ka mana hea mai ka po mai, a ma ke kauoha hoi a wai, i hopu ai oe ia Ole@a ma i ka po nei.

            Ma ke kauoha a ka mea a na kanaka a pau e paulele nei ia Odina e hiki ole ai ke kue aku, wahi a ka pane.

            Alaila, he kipi maopopo kela mea ina he kane a i ole he wahine paha, no ka mea, aole ona kuleana e lawe ai i ko'u kuleana.

            Pela paha, aole au i ike ia mea, wahi a Lameka.

            E Lameka, e noonoo oe i ka mea a kou alelo e kamailio nei, no ka mea ina e pii kuu huhu, aole o'u mea e paa ai?

            Ua kokolo aku la ke puanuanu iloko o ke aakoko o ka@naita Lameka no keia mau olelo a ka moi opio, aka nae, mahope koke iho no ua hoi hou ae la no oia elike me mamua, iaia i kamailio hou @ai ai:

            Aole a'u mea e ae kamailio nei, koe wale no ko'u hoike ana aku ia oe i ka mea olaio.

Aole i pau

 

Halawai a na Komite Kuwaena o ka Hui Hawaii Liberala.

            Ma ka halawai a ka Hui Hawaii Liberala i malamaia ma ke ahiahi Poaha i hala, June 16, @a kohoia na Keonimana malalo iho i mau lala no ke Komite Kuwaena:

            APANA I.

Hon. R. W. Wilikoki   F. H, Keiki

J. W. Kahalewai          G. B. Elama

D. K. Kamakauwila.

            APANA II.

Hon. J. W. Bipikane    S. Kaloa

J. Kahahawai   T. Hoomaha

            APANA III.

Hon. J. E. Buki                       J. K. Prendergast

I. Nauha          J. S. Kekukahiko.

            APANA IV.

C. B. Maile      S. Kanaauao

J. Holoua         Alex. Smith.

            APANA V.

Hon. J. Nawahi                       W. Kalaehao

J. K. Paele       D. W. Pua

 

KO MAKOU MAU LUNA LAWE PEPA.

            Oiai ua hoopauia kekahi mau luna o KA LEO O KA LAHUI, a ua paku@ hou ia mai he mau luna hou, nolaila no ka pomaikai o ko makou poe heluhelu, a i hookoia ai no hoi ka pono a pau, ke hoike aku nei makou i ka papa inoa @ ko makou mau luna e like me keia malalo iho -

D. Kahaleluhi  S. Kua

J. W. Keanu    Wile Buki

H. Kalei

Ma ke Kauoha.