Ka Leo o ka Lahui, Volume II, Number 505, 22 July 1892 — Page 1

Page PDF (976.15 KB)
This text was transcribed by:  Kainani Hartnett
This work is dedicated to:  Ka Leianuenue Parker

KA LEO O KA LAHUI.

"E Mau ke Ea o ka Aina i ka Pono."

-------

Buke II.                                      HONOLULU  IULAI 22, 1892           Helu 505

-------

HE MOOLELO KAILI PUUWAI

-NO-

SENIA LUTERA

------

Ka Ui Puuwai Mabala

-:o:-

ENELANI KAHIKO.

-------

A I OLE

-------

He Nanea Hooheno

no kekahi Kauna

Wahine Opio me

kana mau Aloha

Ekolu.

-------

(Mai ka p@ni mai a ka mea kakau o Avareda, a pela aku.)

-------

MOKUNA II.

-------

Me oe kuu aloha e ka ipo, nolaila

mai paweo ia’u i ka la apopo

o noonoo ia auanei ka

nanehuna a kaua.

-------

      Mawaho ae nae o na mea pau, e hunakele kaua i ko kaua mare ana mai nei a hiki i ka manawa e make ai ka Moiwahine Mabela.  Ua manao au, oia ka pono no kaua elua.

     Nolaila, me oe kuu aloha e ka ipo, a mai noho a paweo ia’u ke ike mai i ka la apopo, o noonoo ia auanei ka nane huna a kaua.

     Aka, e hele mai no e hui me a’u e like me ka mea maa mau, me na maka hauoli a me na helehelena hoihoi hoi i kahiko ia me na minoaka ono e like ma kou ano mau.

     Me keia mau olelo maluna ae, halawai ae la ke ala me ke onaona iloko o hookahi honi loihi, hookahi puili ana a ka ipo i ka ipo, a mahope o ka nana hoomau ana o kekahi i kokahi, hoi hou aku la ua mau ipo nei iloko o ka auwaha o

ke kumakena me ke kumakena, e like me ka mea i olelo ia:

     mawaena o na ipo, ua ukahia ke aloha hookaawale me ke kaumaha a o ke aloha hoi o ka ike ana, ua manawalea mai ia i ka hauoli; nolaila i mea e hooloihi ia aku ai ke kipa koke ana mai a ke kaumaha e hoopanee ka haawi ana i ke aloha hookaawale a ka la apopo.

     Ia Heneri i hookuu mai ai i kana puili ana ia Senia, huli ae la ua nohea nei a hoi pololei aku la no kona wahi poopoo me ka nana mau ana no nae o Heneri mahope o kona mau kapuai, oiai ka malamalama kohaihai o ka mahina e honi hala ole ana i kona mau papalina a me kona mau maawe lauoho e kuehu ana i ka makani, a ua like ua Senia nei imua o na maka o Heneri i kela manawa, me kekahi ao opua e hoohaehae ana i ke ao naulu, e hea mai ana i ka anoi e kipa aku ma ia poai anuhea, ka hele a—

     “Maemae Lihau, molale i ka ehu kai o Puaena; i ka hooipoipo ia e ka makani kiu, kaomi kehau o ke aumoe.”

     Nolaila, hoopaa iho la ua Heneri nei iloko ona pau pele a pau mano, aole loa oia e poina i kela po-ka po hoi nana i hoowaiwai nui mai iaia me ka hauoli- a i lilo hoi ma keia mua aku i keehina wawae mua no ke kaumaha a me ka luuluu, no kona mau la ma keia ola ana.

     Ia Heneri e nalu ana pela iloko ona, aia no hoi na mapunapuna manao oia ano hookahi iloko o Senia, e pili ana no ua po ia—kela po a laua i mare ia ai, i na hora hoi a ka ua e haluku ano, ka po hoi nona na hoomanao poina ole ana iloko ona- he po i piha me ka ino, oiai na ao hakumakuma e huna ana i ka maka o na hoku ka wa hoi a ke kupee hao pelekane o ka mare i hoopaa ia ai ma kona mau lima, nana i punuku mai ka uilani ana a kona mau io hoohana ma keia mua aku.

     No kekahi mau minute pokole mahope iho o ka @ana o keia mau noonoo anoe iloko o ua Senia nei, kapoo aku la oia iloko o kona wahi keena moe a ma ka aoao o kona moe i uhiia me kekahi h@lii i ukali aku kona keokeo i ka Mau o ke kakahiaka nui i noho iho ai oia ilalo, me ka hoonanea ana iaia iho ma ka hone ana i kona mau maawe lauoho hauliuli e luhe ana me he kawelu la no Papiohulu ma o a maanei o kona mau kiwipoohiwi a hala loa aku ilalo i kona mau kapuai wawae.

                                                      Aole i pau.

 

HE MOOLELO

---:NO KE KEIKIALII:---

-------

AWAREDA!

-------

a me

KA UI LEILA

o Noremadi.

-------

(Kakauia no Ka Leo.)

-------

MOKUNA XII

-------

Ka Nohoalii i Hoohakahakaia.

-------

       Aka nae mawaho ae o na mea a pau e Karewada maikai, e hoahewa ia ka mea e noho ae ana maluna o ke kalaunu o Noremadi nei, a ke pau ko’u mau manao hele auwana e hoi hou mai no au no ke kaili hou ana i ka nohoalii mai iaia mai.

     Alaila ua poina oe e kuu haku i @ no, hoahewa ana mai ia oe?  Ua lawa e Karewada mai hoohalike ia oe me Lameka.   No ka mea e hoea mai ana no ka manawa ma keia mua aku e ike ai na makaainana, ua kuhihewa loa ia lakou ma ka lakou mea e paakiki nei.

     Nolaila e haalele ana au ia Wawela nei a aole loa hoi he mea nana e keake’a mai iaia mai ka hooko ana aku ia manao.  O kou hele a me ka ole me a’u  aia no ia ia oe e kuu Karewada.

     I na oe e hele ana e kuu haku no ka imi ana ia Leila, he mea pono ia oe ke hana me ka malu loa, a a ole hoi e pono ke lohe ia o ke ano ia o kau huakai o ka hele ana.

     A oiai oe mahope o ka meheu o ke aloha ipo, na’u e hana na mea a pau mahope nei e like me ka hiki ia’u, aka e kuu haku opio, ua oi aku no kaua hele pu ana, mai kau

pale mai oe ia’u.

     Maluna ou ka’u mau hana hoomaikai ana e Karewada maika a he maolana ko’u ina o oe kekahi me au aole kaua e hoi nele mai ana, aka e hoi mai ana kaua me ka mea a kuu uhane i aloha makolukolu ai.

     Ua kamailio ia mai na olelo maluna ae e ka moi opio me ka leo haahaa a ku i ke aloha.

     Me ka ano haalulu o kona nui kino holookoa mai luna a lalo no ke aloha weia no Leila iaia i hoomau mai ai:

     O kuu Leila wainohia ko’u hoapili mai ko’u mau la opio mai.

     A ua hoopaa kahiko ia hoi ka mare mawaena ona a me a’u e ko maua mau makua, e lilo au i kane, a oia hoi i wahine.

     Ua aloha au i ua nohea la me ke aloha naue ole mailoko maoli mai o ka aapu hookahi i waiho ai kou ola ao ko’u puuwai a pau ua pipili paa mau aku ia iaia i na manawa a pau oia ke ole au.

     Ma ka hoopokole ana, o ka mea e pili ana i na lani, aohe o’u manao hui ia mea i keia manawa, no ka mea aia ko’u manao apau maluna o Leila, me he mea la o kou akua ia.

     Nolaila, o na hana a me na hoao ana a pau e kue mai ia’u mai ko’u mare ia ana me Leila, he mau enemi ino makawelawela loa ia no’u.

      Ua hiki i na mea a pau ke kapa mai ia’u i keia manawa, he hehena, he pupule, he hupo a pela, e like me ka ino i hiki ia lakou ke kapa mai maluna o’u; no ka mea ke hai aku nei au ia oe me ka hookamani ole ua kupouli ia au me ke aloha no Leila a aole paha he kanaka e ola nei i oi aku kona aloha i kana wahine a keiki paha, e like me ke aloha a’@ e hiipoi nei no Leila.

     O kawahine oiaio a hoopono e like ma Leila, oia ka makemake a me ka puu honua o ka lahui o Noremadi nei, a oiai he elua mea nui imua ou i keia manawa oia hoi ka nohoalii o Noremadi nei a me ke kaikamahine a ko kakou Korana i hala e aku i ka make, ke hoopaa nei au i ko’u mano, e haawipio aku i ka nohoalii o noremadi nei no ka pono o ka mea a kuu puuwai i aloha ai.

     E Karewada maikai, wahi hou no ana i hoomau mai ai:

     He kokoolua kou ma keia ola ana oia hoi kau wahine, he hoa hoi nou iloko o ka hauoli a me ka inoa, ke ola a me ka make.

     Ae, he wahi alualu wahine ka’u kuu haku, ua ike no oe ia mea; aka nokeaha la oe i ninau mai ai ia’u pela?

 

NA MAI O KE POO

    KA MAKA,      NA PEPEIAO,

         KA WAHA,    KA PUU-AI,

                A ME KA UMAUMA,

                       ----KA---

PUUWAI,

     AKEMAMA,

          OPU,

              KE AKEPAA

                         ---A ME---

                 PUUPAA;

                             --------------

@huipuia me na ma’i o ke koko a me ka ili, ua hiki loa ia

Dr. McLennan,

ke hoola ia mau pilikia a pau me @ hikiwawe i ike mua ole ia.

     O kona wahi i hoonaauuo ia ai ma ka ike lapaau, maloko no ia o na kula ao Kauka kaulana o Amerika Huipuia, a iloko o na makahiki he 14 i hala hope ae nei, ua ike ia ka holopono o kana mau lawelawe apaau ana ma na mahele mai i hoikeia ae nei maluna ma Kapalakiko, m@ ke ola ana o kekahi poe mai i hooiloiloia e kekahi poe Kauka aole e ola.  E nana i kekahi mau hoike e pili ana no kona makaukau, iloko o kona mau la pokole o ka hiki ana mai i Honolulu nei, o kekahi mau mai i hanaia e na Kauka no kekahi mau mahin@ a no na makahiki kekahi, aole nae he loaa o ka oluolu, elike me---Mr. Geo. Sherwood e noho nei ma Waikiki, i ike ia e na mea a pau nona ka Hale Auau o Waikiki, na

Dr. McLENNAN,

i hoopakele ae iaia no kekahi mau pule pokole, mailoko ae o kona mai loihi.  O Mr. J.T. Walakahauki, kekahi o na kalepa i kamaaina nui i ko ke kulanakauhale nei, na keia

DR. McLENNAN,

i hoola iaia mai ka Rumakika mai, oiai oia ma Kapalakiko he mau makahiki i hala ae nei, ka ma i hoi nana i hoopilikia nui iaia ma Honolulu nei a holo ai no Europa, aole nae i ola a e ole o

DR. McLENNAN,

ola ai, no na mea aku i koe, e hele e huipu me Mr. Walakahauki.   O Mr. Thos. Rewcastle e hana nei ma ka Hui Hana Hao Lokahi, e mau makahiki loihi ae nei kona loaa ana i ka mai eha o ka opu, ua imi i ke ola aole nae he loaa, aka, he mea makehewa ko makou kamailio ana aku no ia mea, e pono no e ninau iaia, a nana e hoike mai.  Na

DR. McLENNAN,

i hoola ia Thomas P. Spencer o ka Elele, W. Heilbron o ka Halekuai Bipi Metapolitana; Mrs. Mary Robinson, he wahine Hawaii mai Paia, Maui mai, mai kona ma’i Akepau mai, o Geo. Townsend eneginia o ke Kaawai Helu Elua, mai kona mai mai ma ka ili a me ke koko ino, i hanaia e kekahi poe kauka e ae a loaa ole ke ola, a na

DR. McLENNAN,

i lapaau a ola.  He lehulehu wale ka poe Hawaii i hoolaia, e pau ole ai m@ keia kolamu.

    O ka poe mai e makemake ana ia Dr. McLENNAN, e hele ae ma kona Keena Hana ma kona wahi noho, o ka poe o n@ ano ma’i a pau me ka ma’i hookaawale ohana, ma ka aoao ma Ewa o ka Halealii, Helu 31, Alanui Rikeke, Honolulu,

          june17 t@d